Shure Beta 58A vs Sennheiser e945 實測🎤 Part 1

🎵示範歌曲：《我真的受傷了》 @t._kho （陶sir）

好多學生問我現場唱歌揀邊支 Mic 好。今日拎出兩支好多音樂人都會用嘅動圈 Mic：$1,300 嘅 Shure Beta 58A 同 $1,700 嘅 Sennheiser e945，直接實測下：

為保證公平，我用咗同一個Interface、同一條線材，並且喺相同距離及空間下錄製，沒有作任何EQ處理，將變數減到最低，盡力俾大家聽到最真實嘅差異。

Shure Beta 58A ($1,300)：我覺得佢係演唱時最「舒服」嘅選擇。嗰種飽滿嘅中頻，正正係我腦海中想像嘅聲音。如果係現場演唱，我會揀佢。

Sennheiser e945 ($1,700)：佢嘅高頻解析力非常好，不過現場唱歌嗰陣我會有少少「唔慣」，因為佢太清亮，感覺聲音會被「壓縮」，會將所有氣息細節全部放大。輸出嘅效果令我有驚喜，不過非常講究控制力。

🔍【點解兩支 Mic 嘅感覺唔同？】

兩者嘅聲學設計上好唔同：Beta 58A 嘅「近接效應」(Proximity Effect) 特別明顯，貼近唱時中低頻非常飽滿，能提供好紮實嘅「厚度」。反觀 e945，佢喺 3kHz - 7kHz 嘅高頻段有顯著嘅增益（Presence Boost），瞬態反應極快，所以聽落非常清亮，會將所有氣息細節同咬字全部放大，非常考驗控制力。

對鍾意唱歌嘅人嚟講，搵一支適合自己把聲嘅 Mic，就如勇士配寶劍，絕對係非常重要。

💡 【價錢並唔係選擇 Mic 嘅關鍵】

雖然兩支 Mic 有 $400 嘅價錢差距，但價錢貴啲，並不代表一定適合你。每個人嘅聲線特質（頻率分佈）、唱歌習慣同埋曲風都唔同。最重要係了解自己把聲，去搵一支能夠同你「截長補短」嘅「寶劍」。

未來我會陸續推出更多實測，用唔同人嘅聲音特質、唔同型號嘅麥克風，甚至配搭唔同風格嘅歌曲做示範，俾大家更清晰嘅參考，記得 Stay Tuned！✨